ماشى وفى حالى .. ساعات بحس ان الدنيا مقفولة
وساعات احس انها بتندهلى ..
اجرى وانسى حتى انى بشر
الف واتغزل حتى فى نسمة الهوا
نقطة المياه
الاقى راجل عجوز محنى .. اقول منا هبقى زيه
الحق اجرى واتنطط .. واللا اتنيل على عينى واسكت
" الحياه حلوة بس نفهمها "
جملة فى قمة الاستفزاز
منا عارف ان الحياة حلوة وايه بس نفهمها يعنى ..
غبى مثلا .. يمكن
بس بردة لسة بقوم على صوت الصبح الربانى
شوية ندى , شوية شمس
والارض هنااااااك لسه طين ياريتنى هناك ..
هناك بتتنفس
هناك تعليقان (2):
اخى عمرو :D
انت بتكتب عامى حلو بجد
مش اقل جمال من اللغة العربية
فيه احساس بيوصل لكل الناس
ولغة بسيطة وروعة فى نفس الوقت
وكذا حد قرأها وقالى كدا..
بجد فنان .. لما الكلمات تكون تلقائيه بالطريقه دى .. ومجرد شغبطة تطلع كدا
وفهمت كل كلماتها والمعنى من وراها :)
بحس انه لازم نلحق كل لحظة واللى اقل من اللحظات كمان .. مفيش فى عمرنا وقت نضيعه ..
دمت بود
اختك بحور :D
اختى العزيزة بحور :D
الكتابة العامية اتجاه جديد من اتجاهات الأدب .. ليس جديدا بالنسبة للكتابات حاليا ولكنه جديد بالنسبة لتصنيفات مجالات الأدب عامة
الخاطرة العامية دى كانت فعلا مجرد شغبطة ومش فى بالى ابدا انها تكون خاطرة , مجرد كلام وكأنى بكلم نفسى مش أكتر
لكن خلينى اقولك ان التأليف باللهجة العامية مش أبسط من الفصحى , لأن لو العامية مكنتش باسلوب راقى وبشكل موزون وأفكار هادفة أكيد مش هيكون ليها معنى ولا غرض .
وكتابة العامية محتاجة مهارات معينة ربما تكون مش موجودة عند كاتب الفصحى :)
شكرا يا روكا لوجودك دايما
إرسال تعليق